أمهات مصر قدموا اقترحاتهم لاستكمال العام الدراسي الحالي
طرحت عبير أحمد، مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة، سؤالا علي أولياء الأمور من الأمهات وهو: “لو كنتي وزيرة تعليم هتتعاملي ازاي مع الدراسة والمناهج والامتحانات في الوقت الحالي؟”.
وتفاعل مئات أولياء الأمور من الأمهات على صفحة اتحاد أمهات مصر للنهوض بالتعليم، عبر موقع التواصل الاجتماعي”فيسبوك”، حيث قالت ولي ولي: “كنت هدخل الولاد من آخر شهر 8 وأخلص المنهج و امتحنهم كمان واكون خلصت مستريحة في شهر 12 عشان كلنا عارفين كويس جدا إن في موجه تانيه، ليه دخلنا في أكتوبر ودلوقتي بيعقبنا ولا ايه أنا مش فاهمه، بيقول الأبحاث فاشلة ما احنا قولنا كده من أول ما اخد قرارها، دلوقتي هو أكتشف إنها فاشله؟!”.
وأضافت ولي أمر أخري: “هعمل امتحانات online والعام القادم الدراسه تبدأ من شهر 6 و إجازة آخر العام في الشتاء حتى تنتهي الأزمة”، وتابعت أخري: “هلغي امتحانات الأنشطة، وهخلي الإمتحانات على فترات كل يوم فئة وفاصل يوم بين الفئات عشان تعقيم اللجان، اللجنة لا تزيد عن 10 طلاب والتباعد مطلوب، فحص الطلاب قبل الدخول إلى اللجان فحص فعلي مش للصورة فقط ولو الأمر ازداد خطورة سوف أؤجل الامتحانات لنهاية العام”.
وذكرت أخري: “هلغى أجزاء من المنهج وهعمل امتحانات بسرعه فى الجزء اللى اتاخد مع طبعا الإجراءات الاحترازية وهلغى امتحان المواد الغير مضافة للمجموع زى الكمبيوتر والرسم”، واستكملت أخرى: “هخصص جزء من المناهج للإطلاع، وهعمل اختبارات تحريرية للمواد اللي بتضاف بس في المجموع وهعجل بمواعيد الامتحانات، هعمل تباعد في اللجان كل مرحله لها أيام وتتوزع أعداد الطلبة على كل المدرسة كل فصل لا يزيد عن 15 طالب بالمشرفين، وأوجه بتطبيق الإجراءات الاحترازية وأنبه على التفتيش الدوري اليومي من الإدارات للمدارس وتحويل أي مقصر للتحقيق الفوري وأعمل زيارات مفاجئه للمدارس في المحافظات مش بس في القاهره طول فترة الامتحانات، وهدى للناس فرصه اللي مش عايز أولاده ينزلوا الامتحانات بدل ما الوزير يقول الولاد يعيدوا السنة ممكن يدخلوا الامتحانات دور تاني في الصيف”.
وأضافت أخري: “هرفع الغياب وهسيب خيار الحضور أو الأون لاين اختيارى، والتقييم أون لاين أو بحث للترم الأول وامتحان الفينال هخليه فى يونيو، يكون الذروة انتهت مع إلغاء أجزاء من المنهج اللى كلها حشو ونركز على الأساسيات بس”،
وقالت أخري: “أولا غلق المدارس والإعتماد على القنوات التعليمية والإنترنت، ثانيا عمل أبحاث وأنشطة دورية كل شهر يتم تسليمها في المدرسة أو عن طريق الانترنت لتقييم الطلاب، وتأجيل الامتحانات لحين توفر اللقاحات أو عندما يخف حدة إنتشار المرض”.
وتابعت ولي أمر أخري: “الوزير غلط جدا فى تأخير ميعاد الدراسة مع أن الجميع كان بيحذر إن شهر 12 وشهر 1 هيكونوا من أصعب الشهور، للأسف هو حط نفسه فى موقف صعب عاوز يكمل وكلنا كان نفسنا ولادنا يمتحنوا ونفرح بنجاحهم، ونحس بنتيجه تعبنا وفى نفس الوقت الوضع أصبح من أسوأ ما يكون، ربنا يستر على الجميع، اللهم ارفع مقتك وغضبك عنا اللهم ارفع البلاء والوباء عنا ياارحم الراحمين”.