كشفت عبير أحمد، مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة، عن خططهم وطريقة تعاملهم مع أبنائهم بعد قرار استكمال الدراسة أون لاين وتأجيل الامتحانات لما بعد انتهاء إجازة نصف العام الدراسي.

وطرحت عبير، سؤالًا ونقاشًا مع أولياء الأمور من الأمهات علي صفحة اتحاد أمهات مصر، عبر موقع التواصل الاجتماعي فيسبوك، حول هذا الأمر، حيث تفاعلت العديد من الأمهات، وقالت إحدى أولياء الأمور: “أنا هخلي ابني كل يوم يحل امتحان لمادة، وكل يوم يراجع مادة”، وتابعت أخرى: “حقيقه احنا لسه مخلصناش المنهج ولسه بنذاكر وبنراجع علي اللي اخدناه وفي وقت طبعآ للعب والموبايل”.

وأضافت ولي أمر أخرى، عبر جروب اتحاد أمهات مصر للنهوض بالتعليم: “متابعة البرامج التعليمية على قناه مدرستنا، بفكر أشوف المنصات وتدريبات ومراجعة بهدوء من غير استعجال”، واستكملت أخرى: “المدرسة هتبدأ معانا من اليوم أون لاين فى نفس الميعاد من الساعة 8 إلى الساعة 2، بعد كدة هناخد وقت للراحة إذا أراد ربنا ونحاول نشوف أخد أيه ونحل عليه أو نراجع على حسب، بس ربنا يهدى الأولاد لأنهم للأسف مقتنعين أنهم فى إجازة ومسيطرة الفكرة عليهم”.

وذكرى ولي أمر: “هما طبعا متعبين جدًا لأن مافيش نوادي ولا مدارس لكن كله يهون مادام فى حضننا، بنحاول نذاكر تاره ونلعب تاره وبعد صدور القرارات الأخيرة الضغط أصبح أقل على الولاد فى المذاكره لسه فى وقت يعملوا كل حاجه بنحاول نشجعهم يرسموا يتعلموا لغه جديده وأوقات طبعًا بنحاول نقنعهم مايتخنقوش مع بعض”.

وقالت إحدى أولياء الأمور: “نخلص المناهج الأول لسه فاضل على الأقل درسين في كل ماده دا بالنسبه للإعدادية ونراجع على فات”، تضيف ولي أمر أخرى: “كل يومين هنراجع مادتين ونحل أسئلتهم عشان بنتى متنساش المنهج لأن حرام نوقف مذاكرة خالص هاينسوا كل المنهج اللى طلع عينينا فى مذاكرته وخلاص كنا امتحنا العملي وداخلين على النظري ونخلص وبعد كده هناخدلنا أسبوعين إجازة نريح ونرجع نراجع تاني لأن أعتقد بنسبه 90٪ مفيش امتحانات بعد يوم 20 فبراير لأن الحالات في زيادة فمينفعش نوقف مذاكره ونضيع تعب الترم على الفاضي وربنا يقوينا”.

وقالت ولي أمر: “وقفت الدروس وبدأت تحفيظ قرآن لمدة أسبوعين مع متابعة لو أمكن قنوات التعليم دون إجهادهم، صراحة إحنا خلصنا المنهج وذاكرنا كويس الحمد لله، لما يقرروا الرجوع إلى المدارس نبقي نراجع ونستذكر، أنا مش هضغط عليهم صراحة عملوا اللي عليهم حبايبي”.

وكان مجلس الوزراء برئاسة الدكتور مصطفى مدبولي، وافق الخميس الماضي على المقترح الذي تقدمت به كل من وزارتي التعليم العالي والبحث العلمي، والتربية والتعليم والتعليم الفني، باستكمال تدريس المناهج الدراسية اعتبارًا من السبت المقبل، وحتى نهاية الفصل الدراسي الأول للعام الدراسي ٢٠٢٠ / ٢٠٢١ بنظام التعليم عن بعد.

تاجز: ـاجيل الامتحانات أخبار التعليم التربية والتعليم التعليم امهات مصر